Methode van Aaken
In` t leste Joahr sinn mii acht graute Eken verdrüügt.
Se stonnen tweehunnert Joahr an eenen Graben
de hebbt se nu uutbaggert
unn doabii de Wuorddeln van de Baim uutrietten
dat kosstt se iähr Liäbben.
Kuorrt för Wiehnachten
mossen se dran glaeiben
boll lachen se annen Grund
een Beld toot grieenen
et nützt nix
wii müett nu uprüümen.
De gröttste Eek
häff bieet Fallen
ne Birk unn ne graute Wittbuche
mettrietten annen Grund
verkeilte Äst heel düörneene
dieep innbohrt in denn Boden.
De moderne Technik rückt vandage nich mit de Piaerde
ne Seilwinde treckt licht de Stamm von sess Meter
sonn`n Harvester kümp mii nich inn`n Buschk
boll laggen se alle anne Stroat
sesstain Festmeters van mien Holt
stuorben an usse Liäbensweise.
Nu stell dii för
Du häss blooß twee Hände
dee siebbensimsig Joahr ächter sick hebbt
ne Saage met nen Motor
unn ne olle Schuffkohr
för dii ligget acht graute Eekenkronen.
Loat`t Wiräks men goahn
frischk doahn iss half wunnen
ussereehn gcheit de Arbeit nich uuten Wegg
datt Füüerholt wiärmt mii vielle Moal
un Oabends denn gesaagten Stapel vör Dii te sain
auk vandaage hebbt wii wir watt schafft.
Intüschken iss`t Appril wuorden
doa liggt so twintig Festmeters
nu sing ick up mine Hannen en Loblied
uowwer se bruukt ne Pause
mancheen hätt´n Tennisarm
ikk häff en Waldarm.
Uobber datt Düörneen kan´k nich guott sain
een Dagg uutrösten sall mie rieken
Muorn goah ik wiär loss
in de Nacht quiällt miee denn Ellenbogen
uowwer de Sloaap heilt miene wunnen auk
mieen Vöörbelt noamt van Aaken.
Intüschken sinn wii innnen Wonnemonat
de Iishilligen hebbt sikk pünktlich innstellt
et riängt üm`t verrecken nich
aobber mett`t Holt bin ik wieet wegg
unn ob Du`ett glöwwst, oor auk nich
van Aaken is daut, siien Credo holl ik in Ehren.